عيّدبي غيابك سنه والليله من العايدين

اي والله اني ضايق ومرهق ومخنوق وحزين ...
واما بموت من الوله وللا بموت من القهر !!


واللي لعب في حسبة ايامي وخلاها سنين ...
اني على ذا الحال ياشعري لي اكثر من شهر !!


بعت المدينه لجل عين ! وقالوا: الخافي يبين ...
ودفنتك بجوفي ! وقالوا: وش بقابك ما ظهر ؟!!


يا مطّول الغيبه ياطول الشوق مير الله يعين ...
العاشق اللي عاش ضامي بين عدّك والنهر !!


عيّدبي غيابك سنه والليله من العايدين ...
ولا عاد عيدك يا الجروح اللي بقلبي من دهر !!


ياصاحبي لوتعتذر عن غيبتك عذرك سمين ...
حبك بعد ماغبت عن عيني تمادى وازدهر !!


من يوم شفتك والنعاس بعينـك النجلا سجين ...
ومن نفس ذاك اليوم وعيوني سجينه للسهر !!


علقتني بالضحكه اللي تسبق الغمازيتين ...
وتركت لي شاعر كتب فيك القصايد واشتهر !!


سيّلت دمعك واستباح الدمع ستر الياسمين ...
وعلمتني كيف الندى يجمّل خدود الزهر !!


ليتك عقب ماغبت غيّبت اشتياقي والحنين ...
او ليتني ماقد دفعت احلام عمري لك مهر !!


وياصاحبي لا عاد تنشدني عن الحزن الدفين ...
اقسى الطعون !! الطعنه اللي من حبيب وفالظهر !!